Luke 24

YisasiꞋa falimainefiti eteno hetimaine.

1Sota yupa kola otinegeꞋya ani aꞋneyaga ago talo tala humalenaleti manaꞋage masavena aliꞋya Yisasina hevaitenaya komulega umainae. 2UꞋya mogayana komumo avayaleꞋma aiso humalaya yafana ago alikeli-talenageno avayalela omalegeꞋya ani yafakapi hai faleꞋya mogayana Yisasi augafa omalegeꞋya mogemainae.

4Omalea yafe “Hanate hane?” huꞋya tusiꞋa amakesa nehavigeno anile tole kanolatana efeꞋage huno alave alave hia kena failiꞋana evaꞋyi haꞋe. 5EvaꞋyi haꞋageꞋya aꞋneyagamoꞋya ageteꞋya tusi koli huꞋya ape hageꞋana ani tole kanolatamogania mage huꞋana haꞋe “NaꞋa higetama afaꞋa mainea kanohena falimainaya vayaꞋmogami matimatipina ati neꞋayae? Mafina omaigi fali-mainefitila ago hetino umaine. 6Kalili mainenoꞋma tamahapai-mainea kea tamakesa hinagetama haviho. 7Mage huno humaineane ‘Ikapinagati emainoa kanoa vayaꞋmo natenea kanomonia kefo kava nehaya vayaꞋmoꞋya natafa huteꞋya yafaga yosale nili nahaeꞋya nasaisageꞋna faligahue. FalisugeꞋya komufi hevainatesageꞋna tole kana maiteꞋna fali-mainesufiti eteꞋna hetigahue.’ huno humaineane. Ani kehena tamakesa havitama havilama hutama haviho.” huꞋana haꞋe.

8HaꞋageꞋya YisasiꞋma humainea kehe amakesa haviteꞋya matimatila ataleꞋya vayaꞋamoꞋya agaya yaꞋene haviya kene Yisasina aleveniꞋa (11) anagaꞋamoꞋyaene nagoꞋa veaꞋene hamapai-mainae. 10Magatala kumate MaliaꞋene YohanaꞋene Yemesina itaꞋamoꞋa MaliaꞋene nagoꞋa aꞋneyagaene YisasiꞋenema tokaeꞋya nemaiya anagala hamapai-mainae. 11Hamapaiyanagi amakesa haviteꞋya “Afa ke nehae.” huꞋya nehuꞋya amakupi maleꞋya amametitia ohunae. 12Amametitia ohayanagi PitaꞋa hetino aiyayeno hevaitenaya yafakapi mope humaineno ageana Yisasina aye-gasagitenaya kenaꞋage mogeteno agesa havi havi huno nomaꞋalega eteno umaine.

Tole kanolatamogania Emeasi katega Yisasina agemainaꞋe.

13Ani kanafina YisasiꞋenema tokaeꞋana nemaiꞋa kanolatana Emeasi kumate ugahe katega vaꞋana anima vaꞋa kamoꞋa Yelusamuti Emeasi umainea kamoꞋa osiꞋa ayaꞋayaꞋa aleveniꞋa (11) kilomita hane. 14Ani tole kanolatana katega neꞋuꞋana ani kanafima humainaya kavafe kea kea hume hume umainaꞋe.

15NeꞋuꞋana ani yafe kea kea hume hume neꞋuꞋana agaila havigegeno agaila havigegeno hume neꞋvaꞋageno YisasiꞋa evaꞋyi huno anakave eno anakaiꞋene tokaeꞋya umainae. 16NeꞋuꞋya anakaya agaꞋanagi anaulaga alino aiso higeꞋana Yisasina agelama huꞋana oꞋagenaꞋe. 17Agelama ohaꞋageno YisasiꞋa mage huno hanavige “NaꞋafe kea kea hume hume neꞋvaꞋe?” huno hanavigegeꞋana anile hetiꞋana maineꞋana anaugosa ayegatule-taleꞋana mainaꞋe.

18Nago kanomo agia KaliopasiꞋa mage huno hie “Kagaya Yelusalemu kumate natu kano mainano? MukiꞋa natu umainaya veaꞋmoꞋya ani kanafima falote humainea kavala ago agemainayanagi kagaikage oꞋagenano?” huno hie. 19Higeno YisasiꞋa mage huno hanavige “Na kavafe nehaꞋe?” huno hanavi-gegeꞋana mage huꞋana haꞋe “Nasaleti Yisasi kehena ohavino? Ani kanoa aune kano maineanagino Anumaya Koti aulagafiꞋene veaꞋmogami amaulagafiꞋene tusiya huno tokiyaꞋage yana talo nehuno tusiꞋa hetofa ke tahanepaiya kanoe. 20Tahanepaiya kanogi tagai mono note kava vayaꞋene kava vayatiene atafa huꞋya kaiyeke huteteꞋya ‘Faligane.’ huꞋya yafaga yosale nili haeꞋya asaigeno falimaine. 21Fali-maineanagi tagaya agaifena Anumaya KotiꞋa taugafa aligatigahe hutegeno emainea kanoe huta tametiti nehune. Nago yana olaga kanoꞋa hae-mainayanagi menia tagaiꞋene nemaiya aꞋnemoꞋya natekefa hatilaviꞋya Yisasina hevaitenaya komulega mogayana Yisasina augafa omalegeꞋya mogeteꞋya eteꞋya eꞋya mage huꞋya me lahapaiye ‘Tagaya ensole kanolata agonageꞋana mage huꞋana tahapaiꞋe ‘YisasiꞋa ago hetimaine.’ huꞋana haꞋa kea tahapaigeta neꞋone.’ huꞋya me hageta tagaya tusiya huta atalitalu humainone. 24Atalitalu hunanagi nagoꞋa tagaiꞋene nemaiya vayaꞋmoꞋya ani komulega uꞋya mogayana aꞋneyagamoꞋyama haya kemoꞋa mukiꞋa tamage hae. Ani kavala humaineanagi Yisasina oꞋagenae.” huꞋana hapaiꞋe.

25Hapaigeno YisasiꞋa mage huno hie “Tanakaya tanakesa nohaviꞋe. MukiꞋa kema Anumaya Koti amaune vayaꞋmoꞋyama kae-malenaya kea havilama hutana tanakupina omalenaꞋe. 26Anima amaune vayaꞋmoꞋya mage huꞋya kae-malenayane ‘Anumaya KotiꞋa taugafa aligatigahema hutesia kanomoꞋa tusiꞋa augafa agata aisia yana aliteno tokiya hale yamaꞋaene kumaꞋalega eteno ugahie.’ huꞋya kae-malenaya kea ohavinaꞋo?” huno hanavige. 27Nehuno MoseseꞋma kae-malenea kemona aepa heno mukiꞋa Anumaya Koti amaune vayaꞋmoꞋya agaifema kae-malenaya kemo aepaꞋa hugafino hanapaiye.

28HanapaigeꞋana ugahema vaꞋa kumatela ago uvaꞋyi haꞋageno YisasiꞋa nagoꞋene hume hume ugahe hianagi anakaya atafa huꞋana mage haꞋe “TaꞋagaiꞋene faegane. YagemoꞋa ago tavifalesigeno aupaꞋa hani kigahie.” huꞋana haꞋageno anakaiꞋene faigahe noꞋanifinaga haifalemaine.

30Haifaleno mopale maineno anakaiꞋene kave negahe kaihame kana maya alino nunamu huno muse huteno aposino neꞋanamigeno anile anaulagamoꞋa aigali higeꞋana Yisasina agelama nehuꞋana “Agayamagae.” huꞋana nehaꞋamaꞋa anile fanane higeꞋana nagoꞋene Yisasina noꞋagaꞋe. 32Ani yafena anakaiꞋani mohu mehu huꞋana mage haꞋe “Vaeha taꞋagaya katega neꞋoꞋageno agaya kanale kea taꞋahapaino Anumaya Koti ke kae-malenaya autaꞋmafi hanea kemona aepaꞋa hugafino taꞋahapaigeno taꞋaipamoꞋa hetigeno taꞋaguꞋamoꞋa tusiꞋa muse hie.” huꞋana haꞋe.

33HuteꞋana aupaꞋa hetiꞋana eteꞋana Yelusalemu vaꞋana Yisasina aleveniꞋa (11) anagaꞋamoꞋyaene nagoꞋa veaꞋyagaene alitalu huꞋya mainageꞋana momake-mainaꞋe. 34MomakaꞋageꞋya mage huꞋya hanapaiye “Tamage AnumayatimoꞋa fali-mainefitila ago hetigeno SaimoniꞋa agemaine.” huꞋya hanapaiye. 35HageꞋana anakaya kategama humainea kavaꞋmo avagea hamapaiꞋana mage haꞋe “Kaihame maya alino aponesigeno anile taꞋaulagamoꞋa aigali higetaꞋa Yisasina agelama hutaꞋa agoꞋe.” huꞋana hamapaiꞋe.

AleveniꞋa (11) anagaꞋamoꞋya Yisasina agemainae.

36Ani kea maiꞋana nehaꞋageno amuꞋnoꞋamifi mo hetimaineno mage huno nehie “TamaipamoꞋa yasi nehinagetama maiho.” huno hamapaiye. 37HamapaigeꞋya amakaya tusiꞋa koli nehuꞋya atalitalu haya yafe Yisasifena “Hakalo emaine.” huꞋya tusiꞋa koli hae. 38Koli hageno YisasiꞋa mage hie “NaꞋa higeno tamaipamoꞋa kanaꞋage nehie? NaꞋa higeno tamakesamoꞋa tole-lole nehae? 39Tamakaya nayaꞋene naiyaleꞋene ageho. Nagayamagae nagaiꞋniꞋa emainoe. Naugafalela navate hutama ageho. HakaloꞋmona augafa ameꞋene ayamufaene omalenegi nagaila naugafa nameꞋene nayamufaene hanegi neꞋagao.” huno hamapaiye. 40Ani kea nehuno aiya ayana amavelie.

41AmaveligeꞋya ageteꞋya tusiꞋa muse nehuꞋya “Tamage nehifi havige nehie?” huꞋya tole amakesa haviꞋya amakesa havi havi nehageno mage hie “Nesua kavela haneo?” huno hamavige. 42Hamavi-gegeꞋya atafi kaemale noyame aliꞋya amigeno alino amaulagafi mata mata huno nemaine.

“MukiꞋa tamaulaga agaya yafena veala hamapaiho.” huno humaine.

44YisasiꞋa mage hie “TamakaiꞋenema tokaeꞋna mainoa kanafina mage huꞋna tamahapai-mainoe ‘MukiꞋa nagaifema MoseseꞋma kae-malenea kene Anumaya Koti amaune vayaꞋmoꞋya kaemalenaya kene Yagame Avopi kaemalenaya kene mukiꞋa anima kae-malenaya kemoꞋa falote huno tamage hugahie.’ huꞋna tamahapai-mainoane.” huno hie.

45Huteno anima kae-malenaya kemoꞋa amakesa halenegeꞋya havilinae. 46Havilinageno “Mage huꞋya kae-malenayane ‘Anumaya KotiꞋa tamaugafa aligatigahema hutesia kanomoꞋa tusiya huno agata aisigeno falisigeꞋya hevaitetesageno tole kana augafamoꞋa komufinaga haneteno fali-mainesifitila eteno hetigahie.’ 47Hetisigetama tamakaya Yelusalemu aepa hetama mukiꞋa mopale kumaꞋyagalega ute ete hutama mage hutama hamapaiho ‘YisasiꞋa tamaku tamamena ago aligatiafe tamakesa havitama kefo yatamihena tamakuꞋa aiyahae hisagenoꞋa Anumaya KotiꞋa aigetamateteno kefo yatamia atalelamategahie.’ hutama hamapaisayafe kae-malenayane.

48MukiꞋa tamaulagafiti agemainaya kavafena hamapaiho. 49Haviho nagaya NenafaꞋma ‘Tamamigahue.’ huno humainea kanomona Alu Aotage Avamula tamakaite hutesugeno egahie. Egahianagi tamakaya mani ala kumate mainegeno eno anafinagati tokiya tamamisigetama alitetama nagaifena mo hamapaiho.” huno humaine.

Anumaya KotiꞋa Yisasina eteno avalegeno ikapinaga haimaine.

50Ani kea huteno amavaleno Petani kumate umaineno ayana alisaga huno mage huno hie “Anumaya KotiꞋa tokiyaꞋaleti tamaya hisie.” huno nehigeno Anumaya KotiꞋa avalegeno ikapinaga haimaine. 52HaigeꞋya Yisasi agia alisaga nehuꞋya tusiꞋa muse hume hume Yelusalemu eteꞋya umaineꞋya muki kanafina efi efi huꞋya ala mono nopi maineꞋya Anumaya Koti agia alisaga humainae.